Listasafn útlands

Louisiana er nútímalistasafn fyrir menn, konur og börn.

Aldur og kunnátta á nútímalistahræringum eru aukaatriði í Louisiana. Þetta fallega safn við sjávarsíðuna, rétt fyrir norðan Kaupmannahöfn, er ferðarinnar virði bara ef þú nærð einum kaffibolla í garðinum fyrir utan. Garðurinn er ekki síðri en sjálft safnið og þar er hægt að gæða sér á veitingum, sóla sig og virða fyrir sér mögnuð útilistaverk.

Innandyra má ávallt finna skemmtilegt sýnishorn af danskri list jafnt sem alþjóðlegri, en farandsýningarnar eru ekki síðri og svo tíðar að það er hægt að fara aftur og aftur, gleypa í sig verk og veitingar. (Teikningin er af PK0 stólnum frá 1952 og er frá sýningu á verkum danska hönnuðarins Poul Kjærholm.)

Það borgar sig að kaupa aðgangsmiða og lestarmiða í einum pakka á Aðaljárnbrautarstöðinni. Lestin er 35 mínútur á leiðinni til Humlebæk og þaðan er fimmtán mínútna gangur að safninu sjálfu.

Louisiana: Opið frá 10 til 17 alla daga vikunnar, nema miðvikudaga frá 10 til 22. Verð frá DKK 80, ókeypis fyrir börn

Hvað er í matinn?

Veitingastaðurinn Spiseloppen er eitt best geymda leyndarmál Kaupmannahafnar.

Kristjanía má muna sinn fífil fegurri, á því er ekki nokkur vafi, en það sem meira er og færri vita, að eitt best geymda leyndarmál borgarinnar er að finna í hrárri og nokkuð drungalegri byggingu í frístaðnum góða.

Spiseloppen er veitingastaður með mikinn sjarma og ótrúlega afslappað andrúmsloft. Matseðillinn er aldrei sá sami tvo daga í röð, hann fer einfaldlega eftir árstíðum og hvað kokkarnir hafa keypt inn hverju sinni.

Kokkaliðið er afar fjölbreytt (eru víst frá sextán mismunandi þjóðernum!) og fær sköpunargleði þeirra að láta ljós sitt skína á girnilegum matseðlinum. Þjónarnir eru heimamenn og þjóna til borðs í sínum eigin hversdags fötum og verðinu er svo sannarlega stillt í hóf.

Þessi 25 ára gamli veitingastaður er gríðarlega vinsæll á meðal Dana en það virðist vera sem að túristarnir hafi enn ekki uppgötvað þennan gullmola. Eftir matinn væri ekki úr vegi að kíkja á hæðina fyrir neðan en þar er til húsa hinn goðsagnakenndi tónleikastaður Loppen.

Spiseloppen er í Kristjáníu (Christiania), nánar tiltekið við Bådsmandsstræde 43. Skynsamlegt er að panta borð um helgar.

Þar sem fagmennirnir versla er þér óhætt

Fields er stærsta verslunarmiðstöð á Norðurlöndum

Ef þér finnst of mikið af fersku lofti og skrautlegu mannlífi á Strikinu gæti verið tilvalið að hoppa úr lestinni á Ørestad-stöðinni milli flugvallarins og miðborgarinnar og koma við í verslunarmiðstöðinni Fields, þeirri stærstu í gervallri Skandinavíu.

Fields opnaði haustið 2004 og þar er af nógu að taka: H&M, Top Shop, Vero Moda, Zara, Next og þessar helstu búðir sem íslenskar konur eru vitlausar í.

Konur athugið: hægt er að parkera karlpeningnum á 2.000 fermetra gervigrasgolfvelli á annarri hæð.

Fields, milli flugvallarins og miðborgarinnar. Opið virka daga 10-20 og laugardaga 9-17

Allir á bak

Þangað til þú hefur geyst um hjálmlaus á ryðguðum fáki í föstudagstraffíkinni hefurðu varla upplifað Kaupmannahöfn.

Eftir að hafa þrætt Strikið í nokkra daga er óvitlaust að slá til og finna hjólaleigu því það er besta leiðin til að kynnast borginni – og fá stinnan rass. Þannig skreppur gamli miðbærinn saman í Lególand um leið og áhugaverðir staðir birtast þar sem síst skyldi: Útikaffihús á torgum, fornbókasölur í hágæðaflokki, rauðir næturklúbbar, róttæk gallerí, kebabsalar með galdrafingur, jassbúllur sem segja sex, dularfullar búðir og ennþá dularfyllri vertshús. Þó ber að gæta sín á spengilegum körlum í grænum nælonbúningum sem hjóla með hraðasendingar um borgina. Þeir eru stórhættulegir!

Borgarhjólin svokölluðu eru á víð og dreif um bæinn á sumrin og það þarf aðeins stinga tuttugu krónum í hjólalás til að festa sér eitt – en hún skoppar aftur í vasann við skil. Ef þér finnst það of hippalegt þá er hefðbundnari hjólaleiga rétt hjá Aðalbrautarstöðinni.

Københavns Cykler er hjólaleiga við aðalbrautarstöðina

Meira svínaríið

Á hverju horni Kaupmannahafnar standa pylsusalar vörð allan sólarhringinn og bíða þess að seðja hungur fólks.

Það er drjúgt upplifelsi að versla við pylsusalana, jafnvel þótt best sé að vita sem minnst um innihald vörunnar sem þeir selja. Þar er tilvalið að æfa skóladönskuna því pylsusalarnir eru upp til hópa ræðnir menn með sterkar skoðanir á málunum og sérstaka hæfileika til að segja hnitmiðaðar gamansögur meðan þeir skella pylsu í brauð eða á servíettu, sprauta sósu og opna drykki.

Grænmetisætur þurfa ekki að neita sér um gamanið því þeir selja líka súkkulaðimjólk sem við teljum jafnast á við það besta á hinum Norðurlöndunum og þótt víðar væri leitað.

Pylsusalarnir eru á hverju götuhorni

Þeir eru djassgeggjarar

Sveittustu djassbúllur í Danmörku

Það væsir ekki um djassgeggjara í Kaupmannahöfn. Djassinn dunar á öðru hverju vertshúsi, djassfestival hertekur borgina á hverju sumri og víða má skella sér í spuna: Mæta með ölglasið og spila af fingrum fram.

Óteljandi staðir bjóða upp á djass en tveir þeirra eru í sérstöku uppáhaldi hjá heimsborgaradeildinni. Annar er Long John Bodega þar sem fjörugur djass dynur á laugardagseftirmiðdögum. Hinn er Hvide Lam þar sem nokkrir gamlir djasshundar ærast á hverju kvöldi. Gamlingjana er hægt að styrkja með því að kaupa sem flesta bjóra því bjórinn hækkar um fimm krónur þegar tónlistin hefst og fyrir mismuninn geta þeir sjálfir keypt sér bjór áður en þeir hjóla heim með hljóðfærin.

Long John Bodega, Købmagergade 48

Hvide lam, Kultorvet 5

Með Íslendingaslóðum

Stór hluti Íslandssögunnar átti sér stað í Kaupmannahöfn.

Til að upplifa þúsund ára sögu Kaupmannahafnar er nóg að ganga um götur hennar, en fyrir Íslendinga er kjörið að fara í gönguferð um Íslendingaslóðir undir leiðsögn Guðlaugs Arasonar rithöfundar. Passið ykkur bara að detta ekki niður stiga.

Gönguferðir um Íslendingaslóðir, frá 30. apríl til 1. október 

Líklega besta safn í heimi

Svalaðu menningarþorstanum í Carlsberg safninu.

Það eru mörg áhugaverð söfn í Kaupmannahöfn. Áhugamenn um elsta konungdæmi heims geta til dæmis svalað forvitninni í Rosenborgarkastalanum. Fyrir listunnendur er nýlistasafnið Arken um 25 mínútur með lest frá miðborginni og Louisiana litlu lengra frá.

Fyrir áhugamenn um bjórfræði og samfélagslega meðvitaðan fyrirtækjarekstur mælum við hins vegar sérstaklega með safni Carlsberg ölgerðarinnar. Sumir myndu segja að það væri líklega besta safn í heimi.

Carlsberg safnið, við Gamle Carlsberg vej. Opið frá 10-16, lokað á mánudögum. Aðgangur ókeypis

Betra en bíó

Nýja danska óperuhúsið er tilbúið.

Frá því skipakóngurinn A.P. Møller afhenti Margréti drottningu lyklana að nýja óperuhúsinu í janúar 2005 hefur verið fullt út úr dyrum á fjöldan allan af metnaðarfullum óperusýningum.

Meðal verka á dagskrá veturinn 2005-06 eru Turandot, Rakarinn frá Sevilla, Leðurblakan og svo mikið af Wagner að mann langar næstum til að ráðast inn í Pólland.

Óperan, miðaverð frá DKK 60

Þeir eiga bæjarins besta brugg

Úti: Vínsnobb. Inni: Bjórsnobb.

Nú þegar allir sem vettlingi geta valdið eru orðnir vínsnobbarar er rétti tíminn til að snúa sér að bjórnum. Matsölustaðurinn Nørrebro bryghus er ákjósanlegur viðkomustaður upprennandi bjórsnobbara. Þar er boðið upp á bæjarins besta heimabrugg og úrvals steikur eldaðar upp úr því. Herlegheitin eru svo framborin í sjálfu brugghúsinu.

Smá ábending: Þeir sem vilja finna bragð af matnum sínum ættu að sleppa Little-Korkny (12%). Það leikur bragðlaukana grátt. Heimborgaradeildin mælir hins vegar með fjögurra bjóra smakki fyrir litlar 50 danskar.

Nørrebro bryghus, við Ryesgade 3 og er opið langt fram eftir kvöldi alla daga.

Franskur matur, dönsk þjónusta, kjánalegt verð

Fyrir þá sem vilja borga of lítið fyrir matinn.

Þú þarft ekki að fara á frönsk veitingahús í París til að láta þjónana móðga þig. Það er nóg af þeim í Kaupmannahöfn − frönskum veitingahúsum það er að segja. Og þar eru þeir bæði kurteisari og ódýrari en í París.

Les trois cochons og Cofoco, báðir á Vesterbro, eru með vinsælli veitingastöðum borgarinnar, enda kostar þríréttuð frönsk veisla bara 225 danskar. Ekki dónalegt verð það.

Les trois cochons, við Værnedamsvej 10

Hljómgæðin Vega þungt

Fyrsta flokks tónleikar á besta horni bæjarins.

Vega í Vesterbro er einn helsti tónleikastaður Kaupmannahafnar. Hér spila allir sem eru eða verða eitthvað en því miður líka hinir sem eiga enga von. Húsið er flott og leit að öðrum eins tónleikasölum enda er kofinn friðaður. Kíktu á tónleikadagskrána.

Lille Vega, öðru nafni Vega Natklub er smærri salur sem breytist í næturklúbb um helgar og hentar vel fyrir þá sem eru sannfærðir um að þeir taki sig vel út á dansgólfinu. Fyrir þá sem ekki komast framfyrir röð er ídealt að kíkja á Ideal Bar sem líka er í sama húsi.

Vega, við Enghavevej 40 út á Vesterbro

Kaup(samkynhneigðra)mannahöfn

Nokkrar tillögur að áhugaverðum áfangastöðum fyrir samkynhneigða í Köben.

Gaysenuna í Kaupmannahöfn er auðvelt að skoða því hún er í hjarta bæjarins í götum sem flestar liggja út frá Strikinu eða í námunda við það.

Töluvert er um rótgróna bari og kaffihús sem gera út á hinsegin hópinn. Til dæmis er tilvalið að byrja kvöldið með á að rölta við á hinu sívinsæla kaffihúsi, Kaffi Óskar, stendur við Radhuspladsen númer 77. Þar má nú finna margan samkynhneigðan landann í léttri stemningu.

Seinna um kvöldið flyst meginþungi næturlífsins yfir á skemmtistaðina í Studiestræde, þar sem óhætt er að mæla með einum skemmtistað umfram aðra á þessum slóðum, hinum sívinsæla Cosy sem er einn rótgrónasti skemmtistaður götunnar.

Að lokum er vert að minna á að Kaupmannahafnarbúar, eins og flestar aðrar stórborgir álfunnar eiga sína sérstöku gay pride daga. Copenhagen Pride hátíðin 2008 verður haldin dagana 11. til 16. ágúst.

Kíktu á Copenhagen Gay Life vefinn fyrir frekari upplýsingar um áhugaverða staði í Köben.

Nýdanskar karlabúðir

Aukahlutir eru í aðalhlutverki í herrafataversluninni Il.

Verslunin Il við Grábræðratorg var nýlega valin besta nýja herrafataverslun bæjarins. Hingað koma yfir-meðallagi snyrtilegir og oftar en ekki sæmilega fjáðir karlmenn á öllum aldri til að kaupa sér svokallaða aukahluti, nærbuxur, sokka, töskur, skyrtuhnappa og fleira frá mönnum eins og Henrik Vibskov, Martin Margiela, Kostas Murkudis, Dolce & Gabbana og fleirum og fleirum.

Snyrtilegir menn með bæði einfaldan og flókinn smekk ættu líka að finna eitthvað við sitt hæfi í Storm (Dior Homme, Burberry Prorsum, Dries van Noten) við Store Regnegade 1, versluninni 1206 (Y3, Marc, Rykiel Homme, Gaspard Yukievich) við Naboløs 3, Pede og Stoffer við Klosterstræde 19 eða Birger Christensen við Østergade 38.

Il við Grábræðratorg 4. Opið alla daga nema sunnudaga